का असे माझ्याकडे हटकून येते?
दु:ख सुद्धा माणसे पाहून येते
मी दिवसभर कोरडा असतो तसा पण
सांज ढळली की मळभ दाटून येते
रोज अश्रूंचा सडा परसात माझ्या
रात्र विरहाच्या कळ्या घेऊन येते
सज्ज ठेवूया चला पंचारतींना
वेदना सांगा कधी सांगून येते?
बोलणे माझे कसे कोणा रुचावे?
बोलतो मी तेच जे आतून येते
शोधतो मी चांदणे केवळ तिच्यातच
ती जरी कायम उन्हे नेसून येते
चंद्र तार्यांची नको देऊ हमी... तू
पापण्या मिटताच अंधारून येते
ह्याचसाठी काढतो खपल्या जुन्या मी
रोज ती फुंकर नवी होऊन येते
चाल करुनी... तो पहा... आलाच मृत्यू
रोज का संधी अशी चालून येते?
3 comments:
Surekh!!!!!
jabri...
esp. liked this sher the most:
बोलणे माझे कसे कोणा रुचावे?
बोलतो मी तेच जे आतून येते
cool. particularity
ह्याचसाठी काढतो खपल्या जुन्या मी
रोज ती फुंकर नवी होऊन येते
faaraach sahi
Post a Comment