रेशमियाच्या गाण्यांनी

चाल : रेशमाच्या रेघांनी

रेशमियाच्या गाण्यांनी
भुंकणार्‍या प्राण्यांनी
कर्ण कसा माझा की हो फ़ोडीला
हात नका लावु त्याच्या सी.डी.ला |

नवी कोरी चोरी सुफ़ी साजाची
'टोपी' चढविली रीमिक्स बाजाची
बाजाची हो बाजाची
माईक आडवा ऐटीमध्ये तोंडाजवळ ओढीला
हात नका लावु त्याच्या सी.डी.ला |

गात जाई प्रत्येक गाणे नाकात
रसिकांच्या उठते तिडिक डोक्यात
डोक्यात हो डोक्यात
चुंबनखोर इमरान हाश्मी, आणिक असतो जोडीला
हात नका लावु त्याच्या सी.डी.ला |

कृपा त्याच्यावर सल्लूमियाची
बाजारात चलती आज कचर्‍याची
कचर्‍याची हो कचर्‍याची
काय म्हणू देवा देवा, जनतेच्या आवडीला
हात नका लावू त्याच्या सी.डी.ला |

एक फ़ायदा दिसे त्याच्या गाण्यात
गाढवही वाटे गाते सुरात
सुरात हो सुरात
न्यूनगंड कित्येकांचा, दूरदेशी धाडीला
हात नका लावु त्याच्या सी.डी.ला |

~ मिलिंद छत्रे